चितवन, रत्ननगर,पुस ८ । ११ औँ संस्करणको रत्ननगर महोत्सवको तयारी तीव्र पारिएको छ । रत्ननगर उद्योग वाणिज्य संघ चितवनको आयोजनामा हुने महोत्सवको तयारी तीव्र पारिएको अध्यक्ष अनिलकृष्ण श्रेष्ठले जानकारी दिए । आज सौराहामा पत्रकार सम्मेलनगरी महोत्सवको बारेमा जानकारी गराइएको थियो ।
आउँदा पौष २७ देखि माघ ८ गतेसम्म हुने महोत्सवमा ३५० वटा स्टलहरु हुने छन् । रत्ननगर महोत्सव हाम्रो पहिचान, व्यवसायिक कृषि र पर्यटन प्रवर्द्धन हाम्रो अभियान भन्ने नारा सहित महोत्सव गरिने श्रेष्ठको भनाई छ ।
१०औँ संस्करणसम्मका महोत्सव सम्पन्न गर्दा यहाँको कृषि र पर्यटनले राम्रो लय लिएको भन्दै श्रेष्ठले महोत्सवको मुख्य उद्देश्य स्थानीय उत्पादन देशभर चिनाउने र त्यसैको बजारीकरणमा सहयोग पुर्याउने गरी महोत्सव गर्न लागिएको उनको भनाई थियो ।
यस पटकको महोत्सवमा तिन लाख भन्दा बढी दर्शकहरुले अवलोकन गर्ने र टिकटसँगै प्रवेश गर्दा अनिवार्य मास्क प्रयोग गर्नुपर्ने नियम समेत बनाइएको आयोजकले जानकारी दिएको छ । महोत्सव प्रवेशका लागि सर्वसाधरणलाई रु. ५० र विद्यार्थीलाई रु. २५ को टिकट रकम कायम गरिएको छ । जेष्ठ नागरिक, फरक क्षमता भएका व्यक्तिहरुलाई परिचय पत्रका आधारमा निःशुल्क प्रवेशको व्यवस्था गरिएको आयोजकले जानकारी दिएको छ ।
रत्ननगर महोत्सव २०७८ लाई भव्यताका साथ सम्पन्न गर्न मूल समिति, स्टेरिङ कमिटी, सल्लाहकार समिति लगायर्ते विभिन्न कार्यका लागि ३९ वटा कार्यगत समितिहरु गठन गरि तदारुकताका साथ काम अगाडि बढाई सकिएको अध्यक्ष श्रेष्ठको भनाई छ।
विगत दुई दशकदेखी प्रत्येक दुइ÷ दुइ वर्षमा आयोजना हुँदै आएको महोत्सव समग्र चितवन जिल्ला तथा विशेष गरी पूर्वी चितवन र रत्ननगरको कृषि, पर्यटन, शिक्षा, स्वास्थ्य विज्ञान, प्रविधि, कला, संस्कृति व्यापार व्यवसाय अन्य आर्थिक महत्वका क्षेत्रहरुको आधुनिकीकरण र वैज्ञानिक उत्पादन प्रणालीसंग अभिमुखीकरण गराउने प्रमुख उद्देश्य लिएको उनको भनाई थियो ।
महोत्सवमा सांगितिक प्रस्तुतीका लागि हसाउने देखि नचाउने कलाकार आउने भएका छन् । प्रमोद खरेल,कमल खत्री,रचना रिमाल,प्रकाश सपुत,दुर्गेश थापा,शैलेन्द्र सिंखडा लगायतका कलाकार आउने बताइएको छ ।
रत्ननगर नगरपालिकाका उपप्रमुख विमला दुवाडीको प्रमुख आथित्यतामा सम्पन्न भएको पत्रकार सम्मेलनमा बोल्दै उनले नगरपालिकाबाट आवश्यक पर्ने सवै सहयोग गर्ने र स्थानीय उत्पादनलाई जोड दिनेगरी महोत्सव अगाडि बढाउन सुझाव दिइन् ।
देशकै तेश्रो पर्यटकीय गन्तव्य स्थल चितवन सौराहाको मुल द्वार रत्ननगर १० टिकौली चौरमा हुने महोत्सवले समग्र आर्थिक क्रियाकलापमा गतिशिलता ल्याउन, स्वदेशमा उत्पादित बस्तु तथा सेवाहरुको बजार पहिचान गरी नव व्यवसायी र व्यवसायिक क्षेत्रको प्रबर्द्धनलाई प्रोत्साहन गर्नका साथै उद्योग एवं व्यापार प्रवर्द्धनको लागि स्थानीय तथा स्वदेशी औद्योगिक उत्पादनहरुको प्रदर्शन, प्रवर्द्धन, प्रचार प्रसारको लागि समेत त्यतिकै महत्व राख्ने बताइएको छ ।
स्थानीय स्तरमा उत्पादित ताजा तरकारी, फलफुल, दुग्ध जन्य पदार्थ, पोल्ट्री लगायत कृषि व्यवसायसंग सम्बन्धित विभिन्न सेवा, प्रविधि एवम् मल विउ विजनहरु महोत्सवमा प्रदर्शनको व्यवस्था गरिने छ । महोत्सव अवधिभर कृषिसंग सम्बन्धित विभिन्न गोष्ठी, अर्न्तक्रिया कार्यक्रम, चितवनको आर्थिक विकास र उन्नयनका लागि विशेष आर्थिक क्षेत्रको स्थापना र चुनौती विषयक कार्यक्रम गर्ने आयोजकले जनाएको छ ।
महोत्सवको अवसरमा चितवन जिल्लाको विविध गतिविधि समावेश गरी रत्ननगर महोत्सव स्मारिका पनि प्रकाशित गरिने र महोत्सव स्थलको सुरक्षाका लागि अत्याधुनिक सीसीटिभीबाट निरीक्षण गरिनुका साथै ५ करोड बरावरको बीमाको व्यवस्था गरिएको छ ।
मुख्य प्रायोजक होटल सेभेन स्टार सौराहा रहेको छ भने संरक्षकको रुपमा रत्ननगर नगरपालिका रहेको छ ।
