गैँडाकोट । जिल्ला निर्वाचन कार्यालय नवलपरासीपूर्वका अनुसार गैँडाकोटमा पनि फोटो सहितको मतदाता नामावली दर्ताको कार्य जारीरहेको छ । जिल्लाका सवै स्थानीय तहमै पुगेर मतदानयोग्य नागरिक समावेश गर्ने लक्ष्य सहित मतदाता नामावली संकलन विशेष कार्यक्रम २०७८ सुरु भएको जिल्ला निर्वाचन अधिकारी लालप्रसाद शर्माले घटनाचक्रलाई जानकारी दिए ।
उनका अनुसार गैँडाकोट नगरपालिकामा पौष ५ गतेदेखि सुरु भएको हो । नागरिकलाई सहज होस भनेर पालिकाकै केन्द्रमा यो कार्यक्रम गरिएको हो । गैँडाकोटमा पौष १९ गतेसम्म कार्यक्रम रहने तालिका रहेको शर्माले बताए । गैँडाकोट नगरपालिकाका नगरप्रमुख छत्रराज पौडेलले कोही पनि योग्य नागरिक संविधानले प्रदत्तगरेको अधिकारबाट बन्चित हुन नदिने वडाअनुसार कार्यक्रम तोकिएको जानकारी दिए ।
पौडेलका अनुसार पौष ५ गते वडानम्वर १ का नागरिकहरुको मतदाता नामावलीमा दर्ता गराइएको छ भने पौष ६ गते वडानम्वर २, पौष ७ गते वडानम्वर ३ र १८, पौष ८ गते वडानम्वर ४, पौष ९ गते वडानम्वर ५, पौष १० गते वडानम्वर ६, पौष ११ गते वडानम्वर ७ र ९, पौष १२ गते वडानम्वर ८, पौष १३ गते वडानम्वर १०, पौष १४ गते वडानम्बर ११ र १२, पौष १५ गते वडानम्वर १३, पौष १६ गते वडानम्वर १४ र १५, पौष १७ गते वडानम्वर १६ र १७ गतेलाई समय तोकेर अभियान जारी रहेको हो ।
वाँकी रहेको दुई दिन अर्थात पौष १८ र १९ गते छुट भएका सवैको नामावली दर्ता गराइने छ । १५ दिनसम्म चल्ने यो अभियानको सवै कार्य भने गैँडाकोट नगरपालिका कार्यालयमै केन्द्र राखेर काम भइरहेको छ । नामावली दर्ताका लागि गैँडाकोटकै स्थायी वासीन्दा भएकाले सक्कल नागरिकताको प्रमाणपत्र र सोको फोटोकपी तथा गैँडाकोट भन्दा बाहिरको नागरिकता भएकाहरुले सक्कल नागरिकता, बसाइसराईको प्रमाणपत्र र सोको फोटोकपी,विवाहित महिलाको हकमा विवाहदर्ताको प्रमाणपत्र र सोको फोटोकपी लैजानुपर्ने छ ।
नामावली सार्ने र सच्याउने सुविधा समेत यसपटक प्रदान गरिएको छ । तर यसका लागि भने स्थानीय तहको केन्द्रमा नभई जिल्ला निर्वाचन कार्यालय कावासोतीमै पुग्नुपर्ने छ । साथै अन्य जिल्लाको नागरिकता छ तर अस्थायी वासोवास छ भने पनि नामावली दर्ता गराउने पाउने सुविधा यस पटक थप गरिएको छ । त्यसका लागि पनि सक्कल नागरिकता र फोटोकपी सहित जिल्लामा दर्ता गराउन सकिने जिल्ला निर्वाचन अधिकारी शर्माले जानकारी दिए ।
१६ वर्ष उमेर पुगी नागरिकता बनाएका जनताहरुको नाम पनि दर्ता गरिने छ तर उनीहरुको नाम १८ वर्ष पुगेपछि स्वतह मतदाता नामावलीमा समावेश हुने शर्माको भनाई छ। नेपालको संविधान २०७२ अनुसार १८ वर्ष उमेर पुगेका नागरिकमात्रै मताहाल्न योग्य हुनेछन् ।
