गैँडाकोट । इलाका प्रहरी कार्यालय गैँडाकोटले ४ राउण्ड लोड भएको पेस्तोल सहित तीन जनालाई पक्राउ गरेको छ । पक्राउ पर्नेहरुमा नवलपरासी (पूर्व) गैडाकोट नगरपालिका वडा नम्वर १४ बस्ने बर्ष ३४ का आशिष सुनार, नवलपरासी (पश्चिम) सुस्ता गाउँपालिका ९ बस्ने बर्ष २० का संजय गुरुङ र रुपैलिया गाउँपालिका १ बस्ने बर्ष २२ का राम बहादुर क्षेत्री रहेका छन् ।
जिल्ला प्रहरी कार्यालय नवलपुरका अनुसार रिवल्भर भने संजय गुरुङको साथबाट बरामदभएको थियो । उनले बोकेको कालो साईड झोला भित्र मेड ईन जर्मन उल्लेख भएको रिवल्भर फेला पारेको प्रहरीले जानकारीदिएको छ ।
पौष पाँच गते ६ बजेतिर गैडाकोट १६ अमरापुरीमा अनिता श्रेष्ठ आफ्नै घरको पसलमा बसीरहेकी थिइन् । एक्कासी लु ४० प ८४३६ नम्वरको मोटरसाइकलमा आएका ती ३ जना व्यक्तीहरुले हतियार देखाई उनको घाटीमा लगाएको सुनको सिक्री लुटेर भाग्न खोज्दा क्षेत्रीलाई स्थानियले नियन्त्रणमा लिएका थिए । स्थानीयले खवर गरेपछि घटनास्थल पुगेको प्रहरीले क्षेत्रीको बयानबाट अन्यपनि संलग्न रहेको थाहा पाएको थियो ।
मोटरसाइकल र क्षेत्रीलाई नियन्त्रणमा लिएको प्रहरीले बाँकी दुई जनालाई गैडाकोट १४ बाट भाग्दै गरेको अवस्थामा नियन्त्रणमा लिएको थियो । त्यसपछि शरीर खानतलासी गर्दा गुरुङले साथबाट रिवल्भर बरामद गर्न सफल भएको प्रहरीको भनाई छ । उनीहरु तीनै जनालाई मुलुकी अपराध संहिता २०७४ को परिच्छेद–६ हातहतियार तथा खरखजना सम्बन्धि कसुर र परिष्छेद–२० को चोरी तथा डाँका सम्बन्धि कसुरमा अनुसन्धान कार्य अघि बढाईएको नवलपुर प्रहरीले जानकारीदिएको छ ।