चितवन, पुष ५ । नेकपा एमालेका उपाध्यक्ष सुरेन्द्र पाण्डेले देशमा राजनीतिक संकट झन्झन् गहिरिदै गएको बताएका छन् । देउवा नेतृत्वको सरकार अस्थिर वन्दै गएको भन्दै उनले राजनीतिक सँगै आर्थिक संकटको खतरमा देश गइरहेको दावी गरे ।
प्रेस चौतारी नेपाल चितवन शाखाले आज भरतपुरमा गरेको पत्रकार भेटघाटमा बोल्दै नेता पाण्डेले विगत दुई वर्षदेखि विद्येयक पनि बनाउन नसकेको, संसदमा ऐन पास गर्न नसक्ने, संसद फक्सनमा नरहेको उनको भनाई थियो । अदालतको बेन्च बस्न नसकेको र लोकतन्त्रका तीन खम्वा मानिने न्यायपालिका, कार्यपालिका र व्यवस्थापिका सवै अस्तव्यस्त रहेको र बेकामे बनेको उनको भनाई थियो ।
यी संकटको समाधान जतिसक्दो चाँडो चुनाव भएमात्रै समाधान हुने अन्यथा नेपाली जनताले धेरै दुख पाउने पाण्डेले बताए । उनले भने,“यी घटना कसरी सेटेल हुन्छ थाहा छैन तर सेटेल हुँदा यसको निष्कर्ष निर्वाचनबाट हुन्छ । त्यसैले देश निर्वाचनतर्फ अघि बढेको महसुस गरेको छु ।”
साथै देशमा आर्थिक संकट गहिरिदै गएको र नेपालमा अर्थतन्त्रमा नकारात्मक लक्षणहरु देखा परेको उनले बताए । केही समय पहिलो १४ महिनालाई धान्ने बैदेशीक मुद्रा संचिती छ भनिएपनि अहिले सात महिनामा झरेको र अझ घटीरहेको उनको भनाई थियो ।
अहिलेका अर्थमन्त्रीले पूरा गर्नै नसक्ने आर्थिक वृद्धिको लक्ष्य सार्वजनिक गरेको, देशमा विदेशी मुद्रा संचिती घट्दै गएको,आयात बढ्दै गएर व्यापार घाटामा देश रहेको र रेमिट्यान्स घट्नुका साथै भुक्तान सन्तुलन नकारात्मक रहेको पाण्डेको भनाई थियो ।
यो स्थितीले राजनीतिक सँगै आर्थिक संकटमा जाने खतरा बढेको उनको भनाई थियो । पर्याप्त विदेशी संचिती नभए झन कठिन समस्या हुने उनको भनाई थियो । सरकारका मन्त्रीहरुले प्रति महिना १० प्रतिशत विकास खर्च गर्ने बताएपनि त्यो गफ मात्रै भएको उनको भनाई थियो । उनले भने,“१० प्रतिशतका दरले खर्च हुन्थ्यो भने त अहिले ५० प्रतिशत पुग्नुपर्ने हो । जवकी ६ प्रतिशत छ । राजश्व उठाइरहेको छ तर खर्च हुन सकेको छैन । वैँकमा तरलता कमजोर छ । डिपोजिट ६४ अरव भएको तर साँढे २ अरव भन्दा बढी ऋण गएको छ । डिपोजिट बढीरहेको छैन ।”
साथै एमसीसी सम्झौता पास गर्ने नगर्ने सरकारको दायित्व भएको भन्दै गठवन्धनवीचनै विवादीत विषयमा प्रतिपक्ष बोलिरहन जरुरी नरहेको प्रष्ट पारे । तर नेपालमा आउने जुनसुकै अनुदान निशर्त नआउने भन्दै एमसीसीमा पनि शर्त रहेको तर देशको हितमा रहेनरहेकावारे भने वृहत छलफल गर्न आवश्यक भएको उनको भनाई थियो
