चितवन, पुस ४ । लालपूर्जाविहीन बनाइएको भन्दै चितवन जिल्ला माडी नगरपालिका स्थित बाँदरझुलाका स्थानीयले काठमाण्डौमा प्रर्दशन गरेका छन् । अव लालपूजा दिएमात्रै काठमाण्डौबाट फर्कन चेतावनी उनीहरुले दिएका छन् ।
चुनावका समय आशा देखउँदै भोट मागेको तर अर्को चुनाव आउँदासम्म पनि कुनै माग सम्वोधन नभएको भन्दै उनीहरुले काठमाण्डौमै गएर प्रर्दशन गरेका हुन् ।
लामो समयदेखि बाँदरझुलामा बसोबास गर्दै आएका उनीहरुले अहिलेसम्म लालपूर्जा नपाएपछि काठमाडौंमै गएर प्रदर्शन गर्नु परेको बाँदरझुला संघर्ष समितिका जगराम प्रजाले बताए । पुषको चिसो मौसममा पनि सरकारले वेवास्ता गर्दा संघर्ष गर्नुपरेको उनको भनाई छ ।
बाँदरझुला सुकुमबासी बस्तीको व्यवस्थापन गर, हामीलाई हाम्रो जमिनको लालपूर्जा दे, धर्ती आकाश साझा हो, बाँदरझुलालाई न्याय खै रु, लगायत लेखिएको प्लेकार्ड तथा व्यानार बोकेर उनीहरुले प्रदर्शन गरेका हुन् । उनीहरुले माइतीघर मण्डलाबाट बानेश्वरस्थित संसद भवन अगाडिसम्म ¥याली गरेका थिए ।
आफूहरुको माग सम्बोधन नभएसम्म काठमाडौँको माइतीघर मण्डलामा आजैबाट अनिश्चितकालीन रिले अनशन शुरु गर्ने प्रजाले बताए । २०४७ कात्तिक २२ गतेदेखि विभिन्न जिल्लाका सुकुमबासी नागरिकहरु बाँदरझुलामा बस्दै आए पनि सरकारले सुकुमबासीको व्यवस्थापनमा चासो नदेखाएपछि आफूहरु बाध्य भएर काठमाडौंमै गएर प्रदर्शनमा उत्रिनु परेको उनको भनाइ छ ।
लामो समयदेखि आफूहरुले उपभोग गर्दै आएको जमीनको लालपूर्जा नभएकै कारण चितवन राष्ट्रिय निकुञ्जको सुरक्षार्थ खटिएका नेपाली सेनाहरुबाट आफूहरुले सास्ती भोग्दै आउनु परेको उनीहरुको गुनासो छ ।उक्त क्षेत्र चितवनको संघ निर्वाचन क्षेत्रनम्वर ३ पर्दछ । जहाँबाट नेकपा माओवादी केन्द्रका अध्यक्ष पुष्पकमल दाहाल प्रचण्डले निर्वाचन जितेका थिए । केही समय पहिले चितवन आएर मतदाताको घरमा पुगेका उनले बाँदरझुला पुगेर नागरिकता भने वितरण गरेका थिए ।
