गैँडाकोट । आज सर्वदलीय बैठक बस्दैछ । प्रधानमन्त्री शेरवहादुर देउवाले आज दिउसो ४ बजेका लागि बैठक आह्वान गरेका हुन् ।
प्रधानमन्त्री देउवाको सचिवालयका अनुसार बैठकमा प्रतिनिधिसभामा प्रतिनिधित्व गर्ने राजनीतिक दलका शीर्ष नेता र पूर्वप्रधानमन्त्रीहरुलाई बोलाइएको छ । तर बैठकमा छलफल गर्ने विषयहरु भने सार्वजनिक गरिएको छैन । तर पछिल्लो समय हटकेक बनेको एमसीसी सम्झौता संसदबाट पारित गर्ने नगर्ने विषयमा छलफल केन्द्रीत हुने बताइएको छ ।
सरकारले संसदको चालु अधिवेशनबाटै एमसीसी सम्झौता पारित गर्ने तयारी गरेको छ । तर नेकपा एमालेले आफूले सांसदहरुलाई गरेको कारबाहीलाई सभामुखले मान्यता नदिएको भन्दै संसद अवरोध गर्दै आएको छ ।
त्यस्तै सत्तारुढ गठबन्धनमा रहेका नेकपा माओवादी केन्द्र, एकीकृत समाजवादी केन्द्र लगायतका दल एमसीसी सम्झौता जस्ताको तस्तै पारित गर्न नहुने पक्षमा छन् । केही समय अगाडि मात्रै १३ राजनीतिक दलहरुले एमसीसी सम्झौता खारेज गर्न भन्दै वृहत प्रदर्शन गरेका थिए । चितवनमा त झन एक दिन बन्दनै गराएका थिए । एमसीसी नेपाल र नेपालीको हितमा नभएको भन्दै उनीहरु सडकमा आएका थिए ।
