चितवन । प्रतिनिधि सभाको बैठक आज बस्दैछ । बैठक आज दिउसो २ बजे बस्नेछ । आजको बैठकमा ६ वटा अध्यादेश पेश हुने संसद सचिवालयले सोमबार सार्वजनिक गरेको सम्भावित कार्यक्रममा देखिएको छ ।
बैठकको शुरुमा सभामुख अग्निप्रसाद सापकोटाले राष्ट्रपति विद्यादेवी भण्डारीबाट प्राप्त संसद अधिवेशन आह्वानसम्बन्धी पत्र पढेर सुनाउनेछन् । त्यसपछि गृहमन्त्री बालकृष्ण खाँणले नेपाल प्रहरी र प्रदेश प्रहरी कार्यसञ्चालन, सुपरिवेक्षण र समन्वय पहिलो संशोधन अध्यादेश २०७८ पेश गर्नेछन् । उनले नै तेजाब तथा अन्य घातक रासायनिक पदार्थ नियमन अध्यादेश २०७८ र सामाजिक सुरक्षा पहिलो संशोधन अध्यादेश २०७८ पेश गर्नेछन् ।
त्यस्तै भौतिक पूर्वाधारमन्त्री रेणुकुमारी यादवले रेल्वे अधयादेश २०७८ पेश गर्ने, कानुन, न्याय तथा संसदीय मामिलामन्त्री दिलेन्द्रप्रसाद बडुले यौन हिंसा विरुद्धका केही ऐनलाई संशोधन गर्ने अध्यादेश २०७८ र फौजदारी कसूर तथा फौजदारी कार्यविधिसम्बन्धी केही ऐन संशोधन गर्ने अध्यादेश पेश गर्ने कार्यसूची तय भएको संसद सचिवालयले जनाएको छ ।
लगातार प्रतिनिधि सभा बैठक अवरुद्ध गर्दै आएको नेकपा एमालेले आज के गर्छ हेर्न वाँकी छ । यस अघि १०औँ महाधिवेशन सम्पन्न पश्चातको कार्यक्रममा प्रमुख प्रतिपक्ष दल नेकपा एमालेका अध्यक्ष केपी शर्मा ओलीले आफूहरुले कारवाही गरेका सांसद बैठकमा उपस्थित भए अवरोध जारी रहने बताइसकेका छन् । उनले एमालेबाट फुटेर नेकपा एकीकृत समाजवादी पार्टीका नेताहरुलाई सांसदबाट कारवाहीको लागि पत्राचार गरेपनि सभामुखले कारवाही नगरेको भन्दै विरोध जनाउँदै आएको छ ।
