चितवन । नेपाल आदिवासी जनजाति पत्रकार महासंघ (फोनिज) चितवनको अध्यक्षमा रमेश रानामगर चयन भएका छन् । मगरको नेतृत्वमा १३ सदस्यीय नयाँ कार्यसमिति चयन गरिएको हो ।
संस्थाको उपाध्यक्षमा तुलमान गुरुङ, सचिवमा उर्गेन तामाङ, सह–सचिवमा सविता दराई र कोषाध्यक्षमा कमलमान श्रेष्ठ सर्वसम्मत चयन भएका छन् ।
सदस्यहरुमा आश्मा राई ,अपेक्षा चौधरी, सुनिलकुमार श्रेष्ठ , मनोज चौधरी , सूचना गुरुङ , दीपेन्द्र चौधरी , बबिलाल तामाङ र प्रतिमा कुमाल चयन भएका छन् ।
शनिबार भरतपुरमा सम्पन्न चौथो जिल्ला अधिवेशनले चयन गरेको कार्यसमितिलाई फोनिजका केन्द्रीय सदस्य राजु चौधरीले सपथ गराएका थिए ।
निवर्तमान अध्यक्ष सन्दीपकुमार श्रेष्ठको नेतृत्वमा रहेको कार्यसमितिले नयाँ कार्यसमिति चयन गरेको हो । फोनिज चितवनको अधिवेशन अघि भएको आठौं वार्षिक साधारणसभामा तीनजना पत्रकारलाई सम्मान गरिएको थियो । फोनिजको संस्थापक अध्यक्ष सन्तकुमार चौधरी, पत्रकार बबिलाल तामाङ र पत्रकार प्रतिमा कुमाललाई सम्मानपत्र र दोसल्लाले सम्मान गरिएको हो ।
नेपाल पत्रकार महासंघकी केन्द्रीय सचिव सिर्जना अर्यालको प्रमुख आतिथ्यतामा सम्पन्न कार्यक्रममा ‘फोनिज सन्देश चितवन’समेत सार्वजनिक गरिएको थियो । कार्यक्रम नेपाल पत्रकार महासंघ चितवनको सभाहलमा सम्पन्न भएको हो ।
