नवलपुर (गैँडाकोट), मंसिर २२ । करिव २२ सय विद्यार्थीहरुलाई पढाउँदै आएको अक्सफोर्ड कलेजले अर्को एक अन्तर्राष्ट्रिय अवार्ड प्राप्त गर्न सफल भएको छ । गैँडाकोट २ मा रहेको अक्सफोर्ड कलेज अफ इन्जिनियरिङ्ग एण्ड म्यानेजमेन्ट यस वर्षको उत्कृष्ट कलेजमा छनौट भएर स्वर्ण पदकबाट पुरस्कृत हुन सफल भएको कलेजले आज पत्रकार सम्मेलन गरी जानकारी दिएको हो ।
कलेजका प्रिन्सिपल हरि भण्डारीले आज पत्रकार सम्मेलन गरी सो जानकारी दिँदै स्वीजरल्याण्डमा रहेको यूरोपियन सोसाइटी फर क्वालिटी रिसर्च (इएसक्यूआर) नामक संस्थाले ‘द क्वालिटी एचिभमेन्ट अवार्ड २०२१’ बाट सम्मान गर्ने भएको हो ।
उक्त संस्थाले कलेज वा संघसंस्थाले आवेदन दिएर र आन्तरिक मूल्याङ्कन गरी दुई विधिमार्फत उत्कृष्ट छनौट गर्ने र अक्सफोर्ड आन्तरिक मूल्याङ्कन मार्फत सो अवार्ड प्राप्त गर्न सफल भएको भण्डारीले बताए । यो अवार्ड पाएसँगै कलेजले हालसम्म १८ वटा अवार्ड प्राप्त गर्ने उनको भनाई थियो ।
इएसक्यूआरले अभिमत सर्वेक्षण, उपभोक्ताको विचारहरुको अनुसन्धान र बजार अध्ययनको आधारमा पुरस्कार पाउने संस्थाहरुको छनौट गर्नेगर्दछ ।
विश्वभर ८३ वटा उत्कृष्ट छनौट गरेको संस्थाको १३ नम्वरमा अक्सफोर्ड कलेज रहेको छ । अवार्ड लिन मंसिर २३ गते प्रिन्सिपल प्राध्यापक इन्जिनियर हरि भण्डारी सहित १६ जनाको टोली जाने तयारी रहेको कलेजले जानकारी दिएको छ ।
अवार्ड डिसेम्वर ११ तारिखमा दुवइको होटलमा हुने बताइएको छ । यो अवार्ड प्राप्त गर्ने कलेज नेपालमै पहिलो भएको र यसले कलेजको मात्र नभई देशकै गरिमा बढाएको उनको दावी थियो ।