नवलपुर । युवाहरुमाझ लोकप्रिय मानिएका जेसी गोकुल सापकोटाले नेपाल जेसीजको वर्ष २०२२ का लागि राष्ट्रिय अध्यक्ष पदमा उम्मेदवारी दिने पक्का भएको छ । त्यो सँगै जित हासिल गर्न प्रचारप्रसारलाई उनले तीव्र बनाएका छन् ।
देशभरका शाखा तथा जेसीलाई अध्यक्षमा आफूलाई निर्वाचित गराउन उनले आग्रह समेत गरेका छन् । देशकै कान्छो जिल्ला नवलपुरको गैँडाकोटमा २०३९ साल भाद्र १८ मा जन्मिएका सापकोटा जेसीजमार्फत धेरै सामाजिक कार्यहरु गर्दै आइरहेका छन् ।
युवालाई राष्ट्र र राष्ट्रियतासँग जोड्दै मानसिक क्षमताको विकासमा आफू लाग्ने जेसी सापकोटाले बताउँदै आएका छन् । सकारात्मक चेत र सोँच भएका युवाले मात्रै परिवार, समाज र देश परिवर्तन गर्न सक्ने भन्दै आफूले नेतृत्व गर्ने अवसर पाएपछि देशभरका १६१ जेसीज शाखा मार्फत युवाहरुलाई आवश्यकता अनुसारको तालिम दिने उनले बताए । नेपाल जेसीजकै खर्चमा युवाहरुलाई तालिम दिएर दक्ष गराउने योजना रहेको उनको भनाई छ ।
तालिम र उत्प्रेरणा दिएर युवाहरुलाई देशको विकास तथा राष्ट्रियताको संरक्षणमा लाग्नेगरी काम गर्ने बताएका सापकोटाले जेसीजमा आवद्ध १८ देखि ४० वर्षका युवाहरुको आकर्षणकै केन्द्रविन्दु बनाएर छाड्ने प्रतिवद्धता व्यक्त गरेका छन् ।
‘राइज फर हुमन डेभलपमेन्ट एण्ड ग्लोवल लिडरसीप’ भन्ने थीमलाई बोकेर अध्यक्ष पदका लागि मैदानमा उत्रिएका जेसीसापकोटाले अवको नेपाली युवाले अन्तराष्ट्रिय तहमा नेतृत्व गर्न सक्ने क्षमता विकास गराउनुपर्ने बताए । आफू अध्यक्षमा निर्वाचित हुनासाथ उक्त मूल उद्देश्यलाई लिएर काम गर्ने उनको भनाई छ ।
देशभर जेसीजको फैलावट हुनुपर्ने र युवा तथा अभिभावकको समेत चासो जेसीज संस्थामा गराउने गरी आफूले कार्यक्रम र योजना ल्याएको सापकोटाले बताए ।
१८ देखि ४० वर्षका युवाहरु आवद्ध संस्थामा रहेको वेथिती र समस्यालाई समाधान गर्ने बताएका सापकोटाले सवैलाई समान व्यवहार गर्ने बताए । कोभिड १९ को महामारी, बाढी पहिरो भुकम्प लगायतको समय नेतृत्व दायी भूमिका खेलेर युवाहरुलाई राहत,उद्दार तथा सामाजिक कार्यमा सक्रिय गराउदै हिँड्ने सापकोटा सफल नेतृत्वतर्फ अग्रसर भएका युवा मानिन्छन् । उनले भने,“जेसीजले धेरै युवाहरुलाई प्रशिक्षित गरिरहेका छ । तर ती युवाहरुलाई राज्यले परिचालन गर्न सकेको छैन । अव राज्य र युवावीच तालमेल हुनुपर्छ जुन मेरो नेतृत्वमा पहल गर्नेछु ।”
सन् २००७ मा गैँडाकोट जेसिजको संस्थापक सदस्य भएका उनी सन् २०१८ मा गैँडाकोट जेसीजको अध्यक्ष भएका थिए । सन् २०१९ मा राष्ट्रिय उपाध्यक्ष, सन् २०२० मा राष्ट्रिय कार्यकारीणी उपाध्यक्षको जिम्मेवारी कुशलापूर्वक निभाइसकेका छन् ।
राष्ट्रिय उपाध्यक्ष हुँदा जेसीज शाखाहरुको भवन निर्माण गर्दा केन्द्रले आर्थिक सहयोग गर्नुपर्ने र जेसीजले राष्ट्रियताको मुद्दालाई समेत प्राथमिकतामा राख्नुपर्ने प्रस्तावलाई निर्णय गराउन सफल भएका थिए ।
जेसीजमा करिव १४ वर्षको अनुभवलाई अव अध्यक्ष पदमा रहेर सोही अनुभवलाई प्रयोग गर्दै जेसीजलाई थप उचाईमा पुर्याउने उनले बताए । जसको नीति उसकै नेतृत्व हुनुपर्नेमा जोड दिएका सापकोटा राष्ट्रिय अध्यक्षमा निर्वाचित हुने बताउँछन् ।
अहिले राष्ट्रिय कानुनी सल्लाहकारको भूमिकामा रहेका उनले भने,“देशभरका जेसीहरुलाई भेटेँ । आफ्नो भावि कार्यक्रम र योजना राखेँ । सवैले साथ दिने बाचा गर्नुभएको छ ।”
नेपाल जेसीजको ४८औँ राष्ट्रिय महाधिवेशन पुष १ देखि ४ गतेसम्म पोखरामा हुँदैछ । जसले वर्ष २०२२ का लागि नयाँ कार्यसमिति चयन गर्ने छ ।
