काठमाडौं । पछिल्लो समय फेला परेको भनिएको ओमिक्रोन भेरिएन्ट नेपालमा समेत पुष्टि भएको छ । स्वास्थ्य मन्त्रालयका अनुसार २ जनामा संक्रमण पुष्टि भएको हो ।

सोमबार पत्रकार सम्मेलन आयोजना गर्दै दुईजनामा भाइरसको नयाँ भेरिएन्ट पुष्टि भएको जनाएको छ ।
मन्त्रालयका अनुसार उनीहरूको स्वास्थ्य सामान्य रहेको मन्त्रालयले जनाएको छ।

ओमिक्रोन संक्रमित भएको मुलुकबाट मंसिर ३ गते नेपाल आएका एक ६६ वर्षीय विदेशी र उनको सम्पर्कमा आएका अर्का एकजना ७१ वर्षीय व्यक्तिमा भेरिएन्ट संक्रमण पुष्टि भएको मन्त्रालयका प्रवक्ता कृष्णप्रसाद पौडेलले बताए ।

दक्षिण अफ्रिकामा पहिलोपटक पहिचान भएको ओमिक्रोन भेरिएन्ट अहिलेसम्म छिमेकी भारत सहित ४० भन्दा बढी देशहरूमा फैलिइसकेको छ।
आफूलाई सुरक्षित राख्न आग्रह गर्दै स्वास्थ्य मन्त्रालयले मास्क लगाउन, अझैपनि भीडभाड नगर्न सुझाव दिएको छ ।