चितवन । नेकपा एमालेले आफ्नो १०औँ राष्ट्रिय महाधिवेशनको तयारी तीव्र पारेको जानकारी दिएको छ । नेपाल कम्युनिष्ट पार्टी (एमाले) केन्द्रीय प्रचार विभागका प्रमुख योगेश भट्टराईले आज भरतपुरमा भएको पत्रकार सम्मेलनमा महाधिवेशनलाई प्रत्यक्ष प्रसारणको व्यवस्था मिलाइएको बताए ।
अवका दिनदेखि महाधिवेशनवारे पार्टीको फेसवुक पेजबाट अन्तरक्रिया कार्यक्रम सुरु गर्ने बताउँदै यो पटक सवै प्रचारप्रसार डिजिटल माध्यमबाट गरिने जानकारी दिएका छन् । उनले भने,“यो पटक भित्तामा पर्चा पम्प्लेट टाँसिदैन सवै डिजिटलबाट हुन्छ । अझ धेरै आशा पत्रकारहरुसँग पनि गरेका छौँ । ”
महाधिवेशनमा करिव पाँच लाख कार्यकर्ता उतार्ने र पाँच करोड भन्दा धेरै खर्च हुने उनले बताए ।
आठ लाख १० हजार पार्टीका सदस्यहरु रहेको र उनीहरुबाट रु। एक सयका दरले सहयोग उठाउँदा ८ करोड १० लाख रुपैयाँ संकलन हुने भन्दै भट्टराइले महाधिवेशन ५ करोड प्लसमा सम्पन्न हुने बताएका हुन् ।
६६ जिल्लामा प्रतिनिधिहरु छनौट भइसकेको जनाउँदै वाँकी रहेका जिल्लाहरुमा पनि केही दिनमै प्रतिनिधि छनौट भइसक्ने उनले बताए । ३२ वटा विभाग, जनवर्गीय संगठन तथा सम्पर्क कमिटीहरुबाट पनि महाधिवेशन प्रतिनिधिहरु छनौट भइसकेको उनले जानकारी दिए ।
अव इ बुलेटिन अपरान्ह तीन बजेबाट प्रकाशीत गर्ने, मंसिर २ गतेदेखि पार्टीको फेसवुक पेजबाट लाइभ गर्ने,मंसिर १ देखि ७ गतेसम्म ७५३ वटै पालिका र सवै वडामा नेकपा एमालेको महाधिवेशन केन्द्रीत अन्तरक्रिया गर्ने उनले बताए । साथै महाधिवेशनमा छिमेकी देश सहित दक्षिण एसियाका सत्तासीन र विपक्षि दलका नेताहरुलाई समेत निमन्त्रणा गरिसकेको र केहीले आउने आश्वासन समेत दिएको उनको भनाई छ ।
एमालेको १०औँ महाधिवेशनपछि सम्पूर्ण कम्युनिष्टहरुको गुरुत्वआकर्षण बढ्दै जाने दावी गर्दै उनले एमालेकै नेतृत्वमा एउटै पार्टी बन्ने बताए । समाजवादको आधार निर्माण गर्दै जाने र यो आधार कुनै माओवादी विचार धारा वा अन्य कम्युनिष्ट विचार धाराले नभई जनताको बहुदलीय जनवादबाट मात्रै सम्भव भएकाले एमालेलेनै सवै कम्युनिष्टहरुलाई एकीकरण गरी अघि बढाउने उनको ठम्याई थियो ।
महाधिवेशनले नयाँ नेतृत्व चयन गर्नेवारे बताउँदै उनले लगभग केपी शर्मा ओलीनै अध्यक्षमा दोहोरिने बताए । महाधिवेशनमा प्रतिस्पर्धा गर्छु भन्नेहरुलाई बाटो खुल्ला रहेको भन्दै चुनाव नभई सर्वसम्मत भए केपी शर्मा ओलीलने पुन अध्यक्षमा दोहोरिने उनको भनाई थियो ।
सम्पूर्ण पार्टीहरुलाई महाधिवेशनमा आमन्त्रण गरिरहदा एमालेबाट केही समय अघि मात्र फुटेर वनेको नयाँ पार्टी नेकपा एकीकृत समाजवादीका अध्यक्ष माधव कुमार नेपाललाई भने नबोलाउने भट्टराइले दोहोर्याएका छन् ।
