चितवन,कार्तिक २० । भरतपुर कारागारका कैदीवन्दीले आफन्तको हातबाट भाइटीका ग्रहण गरेका छन् ।
कारागार प्रशासनले जेलभित्रै टेण्ट टाँगेर भाइटीका लगाइदिन पाउने गरी व्यवस्थापन मिलाइदिएको थियो । कारागार प्रमुख कमलप्रसाद काफ्लेले ठूलो चाडपर्व आउँदा सुरक्षालाई बलियो बनाई यसरी व्यवस्थापन गरिदै आएको जानकारी दिनुभयो ।
अपराध गरीसकेर जेल जीवन बिताइरहदा ठूला चाडपर्व आएको समय खल्लो हुन नदिन यसरी वर्षेनी व्यवस्थापन गरिदिने गरेको काफ्लेले जानकारी दिनुभयो ।
उत्तम साइन ११ बजेर २ मिनेट भएपनि टीका लगाउने जाने आफन्तहरु धेरै भएपछि विहानैदेखि टीका ग्रहणको कार्य सुरु भएको थियो । कारागार प्रशासनले साउण्ड सिस्टमको व्यवस्था सहित भाइटीका लगाइदिने व्यवस्था मिलाइदिएको थियो ।
ठूला चाडपर्वमा आफन्तले दिने आशिर्वाद र भेटघाटले कैदीहरुमा सकारात्मक सन्देश बढेर जाने हुँदा पनि यी कार्यक्रम प्रभावकारी रहेको जेलर काफ्लेको भनाई छ । भाइटीका लगाउन पाउँदा कैदजीवन विताउनेहरु खुशी देखिन्थे ।
कारागारमा अहिले ७२४ जना कैदीवन्दी र ३ जना आश्रीत वालवालिका रहेका छन् । कैदीवन्दीमध्ये ५६ जना महिला रहेका छन् ।
