चितवन। राष्ट्रिय जनावर गाईको संरक्षणमा सरकारले चासो नदिएको भन्दै चिन्ता व्यक्त गरिएको छ। लक्ष्मी पूजाका दिनमात्रै खोज्ने र पूजा गर्ने तर अन्य समय गौ हत्या हुँदा समेत कारवाहीको दायरा फराकीलो नबनाउने भन्दै सरकारको ध्यानाकर्षण गरिएको हो ।
भरतपुर १ मा रहेको योगी नरहरीनाथ वागेश्वरी आश्रमले आज गरेको सामूहिक गौपूजा तथा लक्ष्मी पुजा कार्यक्रममा बोल्दै महेश सन्यास आश्रम देवघाटका पीठाधीश १००८ स्वामी रमणानन्द गिरीजी महाराजले राष्ट्रियताको कोणले पनि गौहत्या हुन नहुनेमा एक मत हुनुपर्ने बताउनुभयो । तर नेपालमा राष्ट्रिय जनावरलाई पनि विभेद गरिएको भन्दै यसको संरक्षणका लागि तीनवटै सरकारले विभिन्न ठाउँमा गौ सरक्षण केन्द्र खोल्नुपर्नेमा जोड दिनुभयो । त्यो भएमात्रै स्थानीय जातको गाई संरक्षण हुने र यसले राष्ट्रिय जनावरको महत्व पाएको हुने उहाँको भनाई थियो ।
कार्यक्रममा बोल्दै देवघाट क्षेत्र विकास समितिका पूर्व अध्यक्ष टंकनाथ पौडेलले ओमकार परिवार एक हुनुपर्नेमा जोड दिँदै वागेश्वरी आश्रमले स्थानीय गाई संरक्षण गर्दै आएको बताउनुभयो । गौ संरक्षणका लागि अक्षयकोष स्थापना आफ्नै पालमा गरेर अहिले लाखौँ रकम जम्मा भएको बताउनुभयो । यसले गौ संरक्षणमा टेवा दिएको भन्दै धर्म र संस्कृति बचाउन पनि सामूहिक गौपूजन वर्षेनी गर्दै आएको जानकारी दिनुभयो।
गैँडाकोट १ का मुक्तिनाथ ज्ञवालीले सामूहिक गौपूजन गर्न पाउँदा खुशी लागेको बताउनुभयो । पर्व आएसँगै गाई पाउन कठिन हुने उहाँको भनाई थियो ।
विहानै देखि गौपुजनमा आएका भक्तजनहरुले गाइलाई मीठामीठा खानेकुरा,घाँस,पराल,पीठो आदि सहयोग गरेका थिए ।
राष्ट्रिय जनावर स्थानीय जातको गाई भएकाले यसको सरक्षणमा वागेश्वरी आश्रम निरन्तर लागिरहेको छ । गुरु योगि नरहरिनाथ को भावना र लक्ष्यलाई लिएर २ सय ५० वटा गाई पालन गरिरहेको महसचिव भोजराज भट्टराईले बताउनुभयो ।
वागीश्वर आध्यात्मिक परिषद योगी नरहरी नाथ आश्रमद्धरा संचालित गौसंरक्षण केन्द्र सँगै प्राकृतिक चिकित्सालय,गुरुकुल संस्कृत विद्यालय समेत संचालन गर्दै आएको अध्यक्ष शैलेन्द्र पियाले जानकारी दिनुभयो ।
अहिले सवै संस्थालाई जोड्नेगरी टायल विच्छाएर विकास गरिएको छ भने ऐतिहासिक महत्वलाई नाश हुन नदिएर पुरातत्व विभागसँग सहकार्य गर्दै थप विकास गर्ने पियाको भनाई छ ।
भगवान रामले शिक्षा लिएको ठाउँ रहेपनि योगी नरहरीनाथ पछि यस ठाउँको खासै विकास र प्रचारप्रसार हुन नसकेको भन्दै आलोचना हुँदै आएको छ ।
