चितवन । नेकपा एमालेका नेता सुरेन्द्र पाण्डेले कम्युनिष्टहरुले कहिल्यै पनि पहिलानै उम्मेदवारी घोषणा नगर्ने बताउनुभएको छ । भरतपुर विमानस्थलमा आज पत्रकारहरुसँग कुराकानी गर्दै नेता पाण्डेले महाधिवेशन सम्मुखमा आएपछि मात्रै आआफ्नो दावी हुने बताउनुभयो ।
आफूले अहिलेसम्म कुन पदमा लड्ने भन्नेवारे केही नसोचेको बताउँदै पाण्डेले भन्नुभयो,“के बुझिराख्नुहोस भने बुर्जुवा पार्टीहरुले हो पहिलानै उम्मेदवारी घोषणा गर्दै हिँड्ने । कम्युनिष्टहरुले होइन ।”
चितवनमा मंसिर १० देखि १२ गते सम्म चल्ने महाधिवेशनको ठाउँ सुनिश्चित गर्न नेता पाण्डे आज चितवन आउनुभएको हो । अध्यक्ष केपी शर्मा ओली सहितको टोलीले ठाउँ पक्का गरेपछि थप कार्य अघि बढ्ने बताउनुभएका पाण्डेले पाँच लाख जनता नेता कार्यकर्ता उतार्ने दावी गर्नुभयो ।
अहिले मूल आयोजक समितिको मातहतमा हुनेगरी १२ वटा समिति बनाएको जानकारी दिनुभयो ।
साथै एमालेले कुनै व्यक्ति वा पार्टीलाई लक्षित गरी महाधिवेशन नगरेको प्रष्ट पार्नुभयो ।महाधिवेशनको उद्घाटनसत्रमा पाँच लाख जनता उतार्ने र वागमती प्रदेशले मात्रै २ लाख बढिको जिम्मा लिएको पाण्डेले बताउनुभयो। उनीहरु सवैको व्यवस्थापनका लागि अव तीव्र रुपमा काम गर्ने उहाँको भनाई छ ।
