चितवन । नेपाल राष्ट्रबैँकले कोरोनाका कारण प्रभावित भएका उद्योग व्यवसायलाई राहत दिने लक्ष्यका आवेदन भर्न आह्वान गरेको छ । कोरोनाका कारण प्रभावित, अतिप्रभावित क्षेत्रलाई विशेष प्राथमिकतामा राखेर राहत दिने बैँकले जनाएको छ ।
राष्ट्र बैंकले इजाजत लिएका क, ख र ग वर्गका बैंक तथा वित्तीय संस्थालाई आवेदन दिन भनेको हो । नेपाल राष्ट्र बैंक पुनः कर्जा कार्यविधि, २०७७ को तेस्रो संशोधनअनुरुप एकमुष्टरुपमा लघु, घरेलु तथा साना उद्यम पुनःकर्जा, साधारण पुनःकर्जा तथा विशेष पुनःकर्जाका लागि आवेदन अनुरोध गरेको छ ।
आगामी पुस १९ गतेसम्म सो कर्जाका लागि आवेदन दिने समयसीमा रहेको छ । कोरोनाबाट अति तथा मध्यम प्रभावित क्षेत्रलाई त्यस्तो कर्जा दिनुपर्नेछ । पर्यटन क्षेत्र, होटल, मनोरञ्जन क्षेत्र, तयारी पोशाक, रोजगारी गुमेका अन्य क्षेत्र, यात्रुबाहक सवारी साधनलगायत विभिन्न १५ क्षेत्रलाई अतिप्रभावित क्षेत्रमा राखिएको छ ।
यस्तै मध्यम प्रभावित क्षेत्रमा खप्ने सामान उत्पादन गर्ने उद्योग, अस्पताल, भण्डारण गर्न सकिने वस्तु तयार पार्ने उद्योग, निर्माणमा रहेका जलविद्युत् आयोजना मध्यम प्रभावित क्षेत्रमा रहेका छन् ।
आवेदन पेश गर्ने बैंक तथा वित्तीय संस्थाले प्रत्येक शाखाबाट न्यूनतम पाँच ग्राहक ऋणी समेटिएको हुनुपर्छ । एकभन्दा बढी बैंक तथा वित्तीय संस्थामार्फत मात्र आवेदन गर्दा लघुउद्यम, घरेलु तथा साना उद्यम क्षेत्रका ऋणीलाई समेट्नुपर्नेछ ।
तर बैँकहरुले यसरी प्रभावितहुनेहरुलाई ऋण दिन आनकानी गर्ने गरेको गुनासो व्यापक भएपनि राष्ट्र बैँकले ग वर्गसम्मलाई मात्रै अनुमति दिएको छ । बैँकहरुले यसरी उपलब्ध गराउने कर्जा प्रकृयानै झन्झटिलो र लम्बेतान गराइदिने भन्दै सेवाग्राहीले गुनासो गरिरहेका छन् । लघुवित्त संघले यस्तो कर्जा घ वर्गका लघुवित्त मार्फत गराउन पटक पटक आग्रह गरेपनि सुनुवाई भने नभएको संघले जनाएको छ । जनताको घरघर पुगेर व्यक्ति तथा समूहमा लगानी गर्ने र निगरानी निरीक्षण निरन्तर हुने भन्दै लघुवित्त मार्फत यस्ता कर्जा प्रवाह गर्न भनिएको हो ।
