चितवन । भरतपुर महानगरपालिकाको शारदानगरमा खानेपानी आयोजना अन्तर्गत ओभरहेड ट्याङ्की बन्ने भएको छ । महानगरपालिकाको १७, १९ र २० वडालाई समेट्ने गरी ५० करोड लगानीमा सम्पन्न हुने आयोजनाको बुधबार भरतपुर महानगरपालिका १९ स्थित मिलडाँडामा महानगर प्रमुख रेनु दाहालले शिलान्यास गर्नुभएको हो ।
भरतपुर महानगरमा यस आयोजना संचालनमा आएसंगै १९ हजार घरधुरी लाभान्वित हुने छन् । ३ बोरिङ, ३ ओभरहेड टंकी र २७४ किलोमिटर पाईपलाईन विस्तार हुनेछ । २ बर्षमा सम्पन्न गर्ने गरी शर्मा एण्ड कम्पनिले ठेक्का सम्झौता गरी निर्माण कार्य शुरू गरेको छ ।
सो अवसरमा बोल्दै प्रमुख दाहालले शारदानगर खानेपानी आयोजना भरतपुरको गौरवको आयोजना भएको बताउँदै यसलाई समयमै सम्पन्न गरेर नगरवासीलाई शुद्ध पिउने पानी प्रदान गर्न उपभोक्ता समितीलाई आग्रह गर्नुभयो।
प्रमुख दाहालले महानगरपालिका भित्र खानेपानीका पूर्वाधार र सरसफाईको क्षेत्रमा करिब ३ अर्ब बराबरको लगानी भइरहेको बताउदै यी आयोजनाहरू सम्पन्न भएपछि महानगरपालिकाको सबै क्षेत्रमा शुद्ध पिउने पानीको पहुँच पुग्ने दावी समेत गर्नुभयो ।
हाल भरतपुर खानेपानी व्यवस्थापन बोर्ड, उपभोक्ता समितीमार्फत आयोजनाबाट ८१ प्रतिशत नागरिकलाई शुद्ध पिउने पानीको पहुँच पुर्याइएको र निर्माणाधिन आयोजनाहरू सम्पन्न हुँदा भरतपुरमा पिउनेपानीको शत प्रतिशत पहुँच स्थापित गर्ने दावी गर्नुभयो ।
सो अवसरमा भरतपुर महानगरपालिका वडा नम्वर १९ का वडाध्यक्ष कर्ण बहादुर गुरूङले शारदानगर खानेपानी आयोजनाले यस क्षेत्रका उपभोक्ताहरूलाई शुद्ध र गुणस्तरिय पिउने पानीको सहज पँहुँच स्थापित हुने बताउदै यस आयोजनाबाट बढि भन्दा बढी लाभ लिन उपभोक्ताहरूलाई आग्रह गर्नुभयो ।