चितवन । नेपाली किसानको केरा बजारमा लग्ने समय मै भारतीय केरा आयात हुँदा किसान मारमा परेका छन् । वर्षभरी लाखौँ रुपैया खर्च गरी केरा उत्पादन गरेपनि बजारमा उचित मूल्य नपाउँदा उनीहरु चिन्तित समेत छन् । भारत सरकारले किसानलाई दिने अनुदान र सहयोगका कारण यहाँ भन्दा सस्तोमा उत्पादन हुने केरा नेपाल आउँदा समेत यहाँको भन्दा कम मूल्यमा पाउने भएपछि नेपाली उत्पादन विक्रि नभएको चितवनका केरा किसान इश्वरी चापागाइले बताउनुभयो ।
उहाँले दुई विघा क्षेत्रफलमा कालिका १ सुर्यपुरमा व्यवसायिक केरा खेती गर्दै आउनुभएको छ । पूर्णरुपमा भारतीय केराको आयात रोक्न नसकेपछि केही महिना ढिलाई गरेमात्रैपनि नेपाली केराले राम्रो भाउ पाउने उहाँको भनाई छ । तर नेपाल सरकारले आफूहरुको कुरा नसुनेको उहाँको गुनासो छ ।
कालिका नगरपालिका १ सुर्यपुरकी तारा तामाङको वाध्यता र गुनासो पनि चापागाइकै जस्तो छ । धान मकै गर्दै आएको जमिनमा अहिले केरा खेती लगाउनुभएको छ । १ विघा जमिनमा विगत ४ वर्षदेखि मालवोउ केरा लगाउदै आउनुभएको हो तर केही वर्ष राम्रै आम्दानी दिएपनि अहिले बजारमा भाउ पाउन कठिन भएको उहाँको गुनासो छ ।
भाउ पाउन कठिन भएपछि किसानहरुले भारतबाट आयात हुने केरा रोक्न माग गरेका छन् । कम्तिमा नेपाली उत्पादनको बजार हुने समय रोकिदिएमात्रै पनि किसानलाई फाइदा पुग्ने उनीहरुको भनाइ छ ।
किसानहरुले मूल्य नपाएको गुनासो बढेपछि केरा व्यवसायी संघ सक्रिय बनेको छ । संघका महासविच जनकराज पन्तले सरकारलाई पटक पटक भारतीय केराको आयात रोक्न आग्रह गरेपनि सुनुवाई नभएको बताउनुभयो ।
कार्तिक देखि मंसिर सम्म जि ९ जातको केराले बजार पाउनुपर्ने हो तर बोटमै केरा पक्न थालेपछि किसान आत्तिएका छन् । मालवोउ जातको केराले बढि मात्रामा बजार पाएपनि अन्य जातका केरा विक्रि नहुने समस्या बढ्दै गएको छ । चितवनमा करिव २ हजार हेक्टरमा केरा खेती गरिदै आएको छ । जसमा ७ सय किसान आवद्ध रहेर वार्षिक करिव २ अर्वको हाराहारीमा आम्दानी गर्दै आएका छन् ।
